Bejtulla Veseli

Bejtulla Veseli u lind më 6 tetor 1981 në fshatin Raincë, Preshevë.

Shkollën fillore e kreu në vendlindje, ndërsa arsimin e mesëm e vazhdoi në Medresenë “Alauddin” në Prishtinë, paralelja në Gjilan, gjatë viteve 1997 – 2001. Pas përfundimit të medresesë, ai vijoi studimet në Fakultetin e Studimeve Islame në Prishtinë.

Në vitin 2001, filloi punën si arsimtar i lëndës fetare në shkollën e fshatit Raincë, “Zenel Hajdini”. Nga viti 2005, u emërua imam në xhaminë “Mulla Sulejmani” në Raincë, ku vazhdon të shërbejë me përkushtim.

Në vitin 2012, mori detyrën e kryetarit të Forumit Rinor Islam në Preshevë, duke dhënë një kontribut të rëndësishëm në edukimin dhe udhëheqjen e të rinjve në aspektin fetar dhe kulturor.

Nga viti 2017, u punësua si sekretar në Medresenë e Luginës së Preshevës, ku vazhdon të angazhohet në organizimin dhe administrimin e institucionit.

Gjatë karrierës së tij, ka marrë pjesë në seminare dhe tribuna të ndryshme brenda dhe jashtë vendit, duke dhënë kontributin e tij në diskutime dhe aktivitete islame. Po ashtu, ka shërbyer si imam i muajit të Ramazanit në Zvicër, duke kontribuar në jetën fetare të mërgatës shqiptare.